التدوين هو نشاط بسيط بس ممكن يكون اله تأثير كبير ع صحتك النفسية وتخفيف الضغط. التدوين هو كمان أداة للتفكير العميق، التحليل، التعبير عن الذات، فهمها والتواصل معها أكتر. التدوين كمان كتير بساعد بمعالجة الصدمات والأزمات لانه بساعد بالوصول لفهم تاني عن الذات وعن المشاكل والظروف المحيطة. بالإضافة انه بعزز الإبداع والتفكير الإيجابي.
- ممكن تجيبي دفتر وتبلشي تكتبي “يوميات الحرب” وتدوني المشاعر والتجارب اللي عم تمرقي فيها بهاي الفترة، اذا الاشي بساعدك.
- دوني النجاحات اليومية البسيطة اللي بتقدري تنجزيها بهاي الفترة.
- ممكن تعملي تمرين امتنان- تكتبي كل الشغلات، الأشخاص، جوانب حياتك اللي بتحسي انك ممتنة لوجودها.
- ممكن تكتبي توكيدات اللي بتذكرك بقدراتك، قيمتك الذاتية، أهدافك، وانجازاتك.
- كتابة حرة- استرخي وفرغي كل الأفكار اللي براسك بالورق.
- فكري بالاشياء المعنوية أو المادية اللي بتحبي تنجزيها بالمستقبل. هاد رح يساعدك تتمسكي بالأمل وتكوني أقوى بهاي الفترة وبعدها.
